Potterinn klikkar ekki!

Við hjónin skelltum okkur á nýju Potter-myndina í gærkvöldi og höfðum gaman af. Og fyrir ævintýramyndafíkilinn var rosalega gaman að sjá sýnt úr komandi myndum, eins og Narnia - ljónið, nornin og skápurinn og King Kong. Ekki síst er ég spennt fyrir þeirri fyrrnefndu því ég las bækurnar hér á árum áður eftir C.S.Lewis og týndi mér alveg í þessum undraheimi sem krakkarnir detta inn í. Svo var líka sýnt úr Superman, lofaði einnig góðu. Reyndar sá ég auglýsingaplaköt sem vöktu mestan áhuga af öllu - ný gerð af Hroka og hleypidómum.... Austenfíkillinn varð gríðarleg spennt og mældi út myndina af hinum nýja Mr. Darcy. Það verður erfitt að feta í fótspor Colins Firth held ég. En þetta kemur í ljós. Gleðst bara yfir því að kvikmyndamógúlar telji Jane Austen ennþá góða uppsprettu fyrir bíómyndir.

En að Potter, sú mynd var bara nokkuð þétt og skemmtileg. Alls engin barnamynd lengur á ferð, enda krakkarnir orðnir eldri og lenda í alvarlegri ævintýrum. Mér fannst bókin ruglingsleg á köflum einmitt í þessari meistarakeppni og því ágætt að fá matreidda mynd úr þeim senum sem voru hvað mest ruglingslegar.

....

Mér finnst ég alltaf vera að koma mér í þær aðstæður að þurfa að kvíða einhverju. Ráðstefnufyrirlestrar, veislustjórn og önnur verkefni þar sem ég þarf að tjá mig fyrir framan sal fullan af fólki. Og þá verð ég andvaka, sef illa, er flökurt af stressi og bara næ ekki neinni jarðtengingu. Viljiði minna mig á að segja nei næst.
...

Skjálftavaktin

Bóndi hefur verið slappur undanfarna daga og í morgun skreiddist hann á fætur skjálfandi og titrandi og fór til vinnu. Hefði með réttu átt að vera undir sæng og reyna að jafna sig. Á svona stundum sést hversu mikil ábyrgð það er að reka eigið fyrirtæki. Við launamennirnir getum a.m.k. verið heima með góðri samvisku þegar vondar pestir herja á mann, en ekki þessir sjálfstæðu atvinnurekendur sem ekki eru með trausta aðstoðarmenn sér við hlið. Ég gæfi mikið fyrir að vera með einn svona aðstoðarmann, já eða geta verið sjálf þarna í fiskvinnslunni og haft umsjón með þessu öllu og leyft bóndanum að vera heima. Verst að ég kann bara ekkert á Baader vélar þegar þær bila né að kaupa á uppboðsmarkaðinum. Né heldur að sjá um þessa útflutningspappíra og allt í kringum þennan fiskbissness.

Æ, hvað ég vorkenni þessari elsku núna.
....

...blikar jólastjarna...

Ég bið ykkur forláts á að hafa ekki verið duglegri að blogga síðustu daga en mér var þeytt til meginlandsins í nokkurra daga vinnu án nokkurs fyrirvara, fékk ekki töskuna mína fyrir en kvöldið áður en ég fór heim aftur, kom heim á föstudagskvöldið og eyddi svo laugardeginum á svokallaðri "langri" kóræfingu, þ.e. æfði jólalög frá morgni til kvölds. Ég náði svo aftur jarðtengingu í gær þegar ég fékk að dunda mér í eldhúsinu við að gera Sörukrem og þrífa eldhússkápa. Ég kann alltaf betur og betur að meta svona heimilisstúss, það þýðir að maður hefur ekkert annað betra að gera sem er bara jákvætt innan um þessi eilífu hlaup svona hversdags.

Kórtónleikarnir verða í Grensáskirkju þann 7. desember nk, þannig ef ykkur langar á jólatónleika þá vitið þið af þessum. Kórstjórinn okkar ætlar aðeins að láta ljós sitt skína og spila á trompet í nokkrum lögunum og svo syngjum við líka með öðrum kór, Samkór Kópavogs. Ég held að þetta verði bara nokkuð gaman.

Er að hugsa um að skríða í háttinn, var að koma að kóræfingu og í kollinum klingir Guðs kristni í heimi og Einu sinni í ættborg Davíðs ásamt aaaaaahhh kafla í Í borg er nefnist Betlehem. Þessir aaaaaahhhh kaflar geta verið ansi snúnir. Sérstaklega þegar maður kann í sjálfu sér ekki nótur og þarf að leggja á minnið. Ég hef alltaf verið með ansi gott sjónminni, og er eiginlega búin að sjá það að maður getur verið með gott heyrnarminni líka, en það er með það eins og hitt að það þarf eitthvað að "triggera" minnið til að tónaröðin velli fram. Æ, vell, kemur í ljós í næstu viku hvort eitthvað hefur setið eftir!
...