Obbosí..

Dreymdi flóð, jarðskjálfta og hamfarir í nótt. Las svo grein jarðeðlisfræðiprófessorsins í Mogganum í morgun. Hann spyr spurninga um stíflugerðina fyrir austan. Þegar sérfræðingar í jarðhræringum, m.a. í Bárðarbungu og öðrum virkum svæðum þarna, er farnir að óska eftir svörum fræðinga LV á síðum dagblaða þar sem ekki sé hægt að fara aðrar leiðir (af því að LV lemur bara hausnum við steininn og þegir þunnu hljóði?) og um er að ræða einn vinsælasta og virtasta jarðfræðiprófessor landsins, þá stendur manni ekki á sama.
Fyrir leikmann eins og mig, sem hef ferðast um þetta svæði í nokkur skipti þá fer ekki á milli mála að þarna ríkja gríðarlega sterk öfl með mikinn eyðileggingarmátt, ummerkin eru alls staðar í fjöllum, gljúfrum og bergmyndunum og yfir öllu trónir jökullinn. En ég hélt bara í einfeldni minni að þarna hefði allt verið rannsakað í döðlur - annars hefði ekki verið gefið grænt ljós á þessa blessuðu virkjun. Maður hélt alltaf að þarna hefði "bara" umhverfis- og náttúruverndarsjónarmiðum verið kastað fyrir borð, en þegar allt í einu dúkka upp spurningar um öryggi og endingu mannvirkjanna og prófessorar í jarðeðlisfræði spyrja spurninga á síðum dagblaða - þá segir maður bara "obbosí".

Siv og Magni

Það hefur nú ekki margt vakið áhuga minn undanfarnar vikur annað en litlu gimsteinarnir mínir á vökudeildinni en þó hefur tvennt stytt mér stundir þegar tími hefur gefist til, í raun alveg síðan ég lá eins og skata í margar vikur á meðgöngudeildinni í sumar og kynntist alveg frábærri manneskju sem fékk mig meira að segja til að prjóna.... Það er hinn hæfileikaríki Magni og vera hans í hinum æsispennandi (ó)raunveruleikaþætti Rockstar og svo væringarnar innan Framsóknarflokksins. Þökk sé herbergisfélaga mínum á deild 22B þá fékk ég smá innsýn í lífið og tilveruna hjá framsóknarmönnum og áttaði mig á því að það er tvennt ólíkt - Framsókn a la Halldór&Co og svo hinir. Og komst að því að ég fílaði "hina" betur og að framsóknarfólk væru bara ágætisfólk þrátt fyrir að ég hefði lagt fæð á þennan flokk vegna Kárahnjúka. Ég vonaði því og krosslagði fingur fyrir Siv í formannskjörinu, enda dugnaðarforkur þar á ferð sem hefur svo skemmtileg áhugamál. Ég hef nefnilega þá kenningu að áhugamálin segi oft heilmikið um viðkomandi manneskju. Og þegar hún hefur gaman af því að ferðast um hálendið, diggar flott hjól og öfluga jeppa, djammar með jeppamönnum og konum og fílar Toyota Tacoma þá hlýtur að vera eitthvað varið í hana. Reyndar hefur Siv það á samviskunni að hafa verið einum of innvikluð í stóriðjustefnu ríkisstjórnarinnar og ber m.a. ábyrgð á því að Laugarvalladalur er orðinn að stoppistöð og afslappelsismiðstöð fyrir múg og margmenni og ekki lengur hægt að fara allsber í nátturulega sturtu með örfáar flugur sem áhorfendur. En ég ætla hinsvegar að beina óánægju minni frekar að henni Álgerði. Siv fær nebblega fleiri plúsa í kladdann en hún. En flokkurinn svo sem gerði út af við þann fjarlæga möguleika að ég myndi kjósa hann með kjörinu sínu í gær. Verst að það eru fáir aðrir möguleikar eftir... Maður þarf greinilega að leggjast undir feld í vetur.

En aftur að hinu áhugamáli sumarsins - Rockstar. Ég nefnilega datt um svona áhangendasíðu þar sem ýmislegt hefur komið í ljós. Eins og t.d. að "performance" þættirnir eru teknir upp á sunnudögum og maður fær fréttir af gengi allra í gegnum svona "spoilers" á spjallþráðum. Og að Magni er alltaf talinn með topp fimm söngvurunum og er kallaður "Magnipedia" þar sem hann er botnlaus fróðleiksbrunnur um tónlist eins og Wikipedia gagnagrunnurinn á netinu. Og að Zayra og Jason Metallica eru líklegt par... Jamm. Linkurinn á þessa fróðleikssíðu er http://www.rockband.com og farið þaðan í forumið.

Og að lokum, þið sem hafið áhuga á að fylgjast með tvibbalingunum, sendið mér póst.

Tata

Veiði og humar

Við skruppum aðeins á rúntinn í gær, sunnudag. Kíktum á Þingvelli og þar skein bara sólin og vatnið var alveg spegilslétt. Þar sátum við í einni víkinni og þóttumst vera að veiða eitthvað og Aska var í essinu sínu. Þetta var ægilega ljúft og indælt. Kíktum aðeins á Úlfljótsvatn og borðuðum nestið okkar og Beggi kíkti eftir risaurriðum. Hittum þar fyrir einn kunningja sem keypti þarna lóðir á háum prís og sá prís hefur víst tvöfaldast. Algjör bilun í gangi fyrir eitthvað sem manni finnst alls ekki þess virði. Síðan lá leiðin í Grímsnesið og svo á Selfoss. Þaðan rúntuðum við niður í fjöruna við Stokkseyri og enduðum í humri við Fjöruborðið. Namminamm. Að lokum fengum við okkur svo SvissMocha á KaffiKrús á Selfossi og lulluðum í bæinn aftur. Bara alveg frábær dagur. Og mikið rosalega er fjaran falleg þarna fyrir austan. Blálilja var í miklum blóma þannig að það var svona bláleitur blær yfir allri fjörunni. Virkilega flott.
En það vakti athygli okkar að allan Þingvallahringinn og í Grímsnesinu var ofboðslega mikil umferð og mikið af fólki. Þarna var hálf höfuðborgin á ferð held ég. Synd ef hávaðamengun sökum umferðarþunga fer að eyðileggja friðsældina þarna fyrir austan.
...

Huh?

Það er sól úti!?!?!! Ótrúlegt. Ég veit varla hvað ég á af mér að gera...
...

Kvef og læti

Eyddi gærdeginum og nóttinni í kvefþjáningar frá helvíti. Ömurlegt að fá svona heiftarlegt kvef núna. Og það er vont að hnerra og hósta með bumbu. Þetta kvef byrjaði ósköp sakleysislega sl. föstudagskvöld en skall á af miklum þunga í gærmorgun. *snýt* Oj bara.
..

Þjóðarbúskapurinn

Það er kannski bara ágætt að fá einn farsælasta fjármálaráðherrann í stól forsætisráðherra. Geir hefur svo sem ekki verið þekktur fyrir að spandera fjármunum. Ég bara vona að hann herði samt ekki ólina í velferðarmálum - sú ól hefur verið ansi strekkt undanfarin ár og má ekki við meiru. Hins vegar er alveg kominn tími á að slaka á í stóriðjumálum - eiginlega bara leggja allt slíkt á hilluna í bili. Áfram Framtíðarlandið Ísland!!! Skora á ykkur að skrá ykkur í félagið!

Lágvært suð

Nýja þvottavélin kom áðan - loksins! Fyrsti þvotturinn er að veltast um í henni og það heyrist varla neitt nema lágvært suð. Mikið rosalega hefur gamla vélin verið hávær!
....

Vatnsveður...

Hvað er eiginlega með þetta veður? Það er eins og öll rigning á norðurhveli jarðar þurfi að falla á suðvesturhorn landsins akkúrat núna í júní. Það er rigning í kortunum eins langt og augað eygir fram í næstu viku. Þetta veður er farið að minna mig á rigningarsumarið þegar ég og Íris vorum í unglingavinnunni í Breiðholtinu hérna i denn. Upp á hvern einasta dag klæddum við okkur í regnstakkana og fórum með Ellefunni niðrí Bakka og héngum þar fram á hrífur og sköfur og létum okkur dreyma. Stundum um betra veður jú, en líklega oftar um stráka og Duran Duran. Keyptum okkur Apollo lakkrísrúllur og annað nammi, hlustuðum opinmynntar á eina stúlkuna í hópnum sem virtist ægilega reynd og lifuð miðað við okkur og blótuðum arfanum sem spratt sprækur í öllu votviðrinu. Og þannig leið þetta sumar, í einhverjum rigningarsudda. Enda var þetta mitt fyrsta og síðasta sumar í unglingavinnu, sumarið eftir vann ég á gistiheimili og hóteli og sumrinu þar á eftir eyddi ég í sólinni í Suður-Noregi. Mér verður oft hugsað til "ást" minnar á arfanum þegar ég af fúsum og frjálsum vilja fer hér út í garð í sudda og fer að reyta arfa af bestu lyst!

Annars var ég að hleypa Ösku út að pissa. Hún er ekki alveg að fíla þetta veður heldur, því það þýðir að eigendurnir eru ekki alveg jafnsprækir í að skottast með hana úti. Og svo fær hún ekki að leika sér lengi úti því þá verður hún öll blaut og skítug. Það er bara út að pissa og inn aftur! En við erum að spá í að fara kannski að veiða eitthvað um helgina, líklega í Þingvallavatni og þá fær hún eitthvað að dinglast úti.
....

Búin að....

* gera og skila framtalinu okkar hjóna (já, veit - soldið seint, en ég nýti mér endurskoðendafrestinn...)
* ganga frá staðgreiðslunni fyrir fyrirtækið
* raða bókhaldsgögnum fyrir fyrirtækið
* Skila rauðvínsflösku í HM pottinn í vinnunni og syngja inn á myndband
* Vinna nokkur verkefni fyrir vinnuna
* Hjúkra veikum eiginmanni og vorkenna honum svo á meðan hann stóð úti í rigningunni að hjálpa Kjartani gröfukarli
* Tala við mömmu í Suður Frakklandi
* Hringja í báðar systur mínar sem ekki svöruðu
* Bíða árangurslaust eftir nýju þvottavélinni minni...

Og ég held ég fari bara í háttinn í þessum skrifuðu orðum!
.....

Bara allt að gerast!

Ég var búin að ákveða að hafa það sem náðugast í dag, enda á ég að vera heima hjá mér í "hvíld" samkvæmt læknisráði, þ.e. gera sem minnst. En svo einhvern vegin þróast allt og nú er bara nóg um að vera. Kjartan mættur að grafa hjá nágrönnunum - búið að bíða eftir þessu í 2 ár - og það þarf að klára að bjarga gljámispilnum frá glötun, þvottavélin nýja kemur á eftir og rýma þarf í þvottahúsinu og ég þarf að klára ýmislegt fyrir fiskvinnslubókhaldið. Ég þarf nú reyndar að gera minnst, bóndinn stendur þarna úti með Kjartani gröfukarli og er að moka og hamast, með hálsbólgu og hita. Og ég fer varla að bera gömlu þvottavélina eitt eða neitt. En ég er rosalega góð í að hafa umsjón með þessu öllu....

...

Ja hérna hér...

Það er sól úti. Ég var eiginlega búin að gleyma því hvernig hún lítur út. Kannski maður komi þessu örfáu kryddjurtum niður - þær bíða gegnvotar hérna á stéttinni. Það var ekki hundi út sigandi í gær, Aska lagðist næstum því í þunglyndi en tók þann kostinn að misþyrma bangsanum sínum í staðinn.

Vaknaði við aðra rödd en venjulega í morgun. Hvað varð um Magnús? Hins vegar ætla ég að gefa hinum nýja morgunhana séns fyrir það eitt að hann spilaði lag með Beck af plötunni Sea Change. Sú plata er bara snilld.

Er á leiðinni í mæðraskoðun, best að greiða sér fyrir ljósuna.
.....

Bilun

Blessuð þvottavélin er biluð aftur. Hún bilaði um daginn en því var fljótreddað, skipt um kol og hún hrökk í gang aftur fyrir nokkra þúsundkalla. En núna, örfáum vikum síðar, virðist hún aftur orðin þreytt og neitar að vinda þvottinn. Þessi elska sem hefur fylgt okkur allt frá því að við byrjuðum að búa í Heiðargerðinu 1991. Jamm, hún er fimmtán ára og sömuleiðis sambúð okkar hjóna. Og þessi vél var innflutningsgjöf frá mömmu og pabba og hefur fylgt okkur síðan. Og núna er spurning að láta gera við hana á ný. Eða kaupa nýja. Kannski er betra að kaupa nýja heldur en að sitja uppi með gamla vél síbilandi þegar þvo þarf heilu fjöllin af tvíburaþvotti....
..

Það eru kríur spígsporandi á lóðinni hjá mér. Úrvalið er því alltaf að aukast, því fyrir utan þetta venjulega (snjótittlinga, þresti og starra) þá hafa hér sest gæsir, endur, lóur, tjaldur, svartbakur og nú kríur. Það er greinilega eitthvað í grasinu hérna hjá mér sem freistar... :o)

Hin tíkin..

Hún er skrítin tík þessi pólítík þessa dagana. Ég datt inn á áhugaverðan pistil hjá Össuri hinum orðheppna núna áðan. Þetta er farið að minna á svolítið æsilegan saumaklúbb með mergjað slúður streymandi fram á alla kanta. Maður hefur svo sem ekki verið að velta sér upp úr því hverjir tilheyri hvaða fylkingum innan Framsóknar hingað til enda sá flokkur ekki höfðað til mín fram að þessu. En áhugavert er að fylgjast með! Mér sýnist alltaf vera fjör í fjölmiðlaumfjöllun nú orðið - kemur sjaldnast orðið gúrkutíð! Sem er hálfgerð synd því það var alltaf gaman að fá ítarlegar fréttir af útnárum þessa lands, aflabrögðum smábáta og uppákomum á Grenivík. Það tilheyrði orðið sumrinu. En nei, núna eru bara stórfréttir upp á hvern dag og Sigmundur Ernir alltaf jafn brúnaþungur á skjánum.
...

Sitt lítið af hverju

Hvítasunnuhelgin var ósköp ljúf og skemmtileg þrátt fyrir að við færum ekkert út úr bænum. Ég keypti sumarblóm á föstudeginum og Beggi var voða duglegur að koma stóra beðinu í stand og byrjaði líka að hlaða nýtt steinabeð. Við þurfum nefnilega að hálfrústa beðinu meðfram innkeyrslunni því það þarf að færa allar plöntur til svo að þetta stemmi allt. Laugardagurinn var alveg frábær því æskuvinkomu minni var komið á óvart með alveg stútfullu gæsaprógrammi. Það var m..a farið í magadans, skemmtileik sem fól í sér gamla leiki eins og hollí hú og teygjó og svo heimsókn á baðstofuna í Laugum. Ég ætla pottþétt þangað aftur, alveg ferlega notalegt. Kannski ekki skrítið því ég er potta- og baðfíkill þessa mánuðina. Gæti búið í sundlaugunum. Væri samt skemmtilegra að fá betra veður svona almennt - mér finnst alltaf vera rigning eða kalt! Veðrið var hins vegar alveg yndislegt sl. laugardag, enda var meirihluta dagsins eytt útivið. Á sunnudeginum var ég bara í leti, en fór svo í mat til Huldu systur á meðan eiginmaðurinn sinnti mótorhjólaáhuganum við Heklurætur. Í gær fórum við svo í bíó og sáum X-men 3. Bara alveg ágætis afþreyingarmynd og krílin voru ansi aktív á meðan, mikil aksjón og fullt af poti og spörkum!
Við kenndum líka Ösku í gær að heilsa, og þegar Beggi rifjaði þetta upp með henni í morgun þá var hún sko alveg með þetta á hreinu. Það greinilega virkaði vel að kenna þetta með kindakæfu - henni finnst það algjört lostæti!

Annars er ég í hálfgerðri fýlu. Ekkert Prison Break í sjónvarpinu í kvöld. *sniff*

Öskublogg

Aska hin Austfirska er öll að koma til eftir veikindin í vikunni, en þá þurfti hún að fara í smá aðgerð og lyfjakúr vegna sýkingar í kirtlum og augum. Hún var ægilega aum eftir aðgerðina og við hjónin ekkert síður aum að horfa upp á hana slappa og reikula í spori eftir aðgerðina. En hún er öll að hressast og bíður nú eftir því að loforðið um göngutúr í Heiðmörkinni verði uppfyllt. Það er á dagskrá núna um helgina. Annars dafnar hún vel., orðin rúm 28 kíló og er enn að stækka held ég. Uppáhaldsleikur hennar er að finna fólk, hluti og mat, þefskynið í þessum hundi er alveg ótrúlegt. Ætli henni finnist þó ekki skemmtilegast að finna mat, t.d. pulsubita. Enda er hún matargat eins og flestir hundar. Við erum á löngum biðlista eftir hundanámskeiði, það er greinilega mjög "in" í dag og allir hundaskólar yfirfullir. En þetta er nauðsynlegt, það eru ákveðnir hlutir sem verða að vera í lagi þegar maður á stóran hund, eins og t.d. að flaðra ekki upp á aðra - ekki síst börn!
...

Sammála!

Ég og Páll Óskar erum sammála um að rúmenska lagið sé æðislegt. Á rás 2 var verið að segja frá því að söngvarinn hafi staðið sig mjög vel á æfingunni sem stendur yfir núna. Tornero - tornero.... Flottur taktur og á örugglega eftir að hljóma á öllum diskótekum í sumar. Palli var reyndar að segja að hann héldi að kántríframlag Þjóðverja myndi koma á óvart og vera í topp 5. Hmmm.....veit ekki alveg hvað mér á að finnast, þá fíla ég frekar hana dönsku Sidsel að tvista. Ég missti af Litháen í gær og hef verið að reyna að hlusta á það í gegnum netið án árangurs. Það segja margir að það hafi verið fyndið og skemmtilegt atriði. Svo segi ég bara áfram Finnland - þeir voru ógeðslega flottir í gær - í bókstaflegri merkingu. Og frábært sjóv hjá þeim með eldglæringar og gítargos. En þegar myndavélarnar koma of nálægt þeim þá fær maður hroll, enda var ég alltaf frekar hrædd við Orkana í Hringadróttinssögu!

Já, heilsan er greinilega betri í dag fyrst ég er að komast í Júróvisjónstuð... Minni á síðuna góðu, www.esctoday.com, þar er að finna margt gott slúðrið og umfjöllun um æfingar og keppendur!
...

Ég verð eiginlega að játa að ég er fegin að fröken Silvía komst ekki áfram. Það sparar manni þá skömm að þurfa að horfa upp á hana aftur í sjónvarpinu á laugardaginn og verða sér og okkur til skammar. Það verður bara ljúft að horfa á úrslitakeppnina, þá get ég haldið með Rúmeníu og Bosníu í friði og þarf ekki að hafa áhyggjur að verða flökurt af stressi.... :o)

...

Ég fór í vinnuna í dag í fyrsta sinn eftir langa fjarveru. Svolítið skrítið að sitja allt í einu bara við skrifborðið og vera farin að vinna. Ég komst að því að ég hafði greinilega vanist því ágætlega að vera bara heima. Ég vann nú samt ekki fullan vinnudag, er ekki með leyfi fyrir því ennþá. Ég var send á ferlíkinu í vinnuna og komst að því að öll bílastæði í Borgartúni passa ekki fyrir jeppann, ég var í miklum vandræðum með að leggja honum. Hinn var í bóni og þvotti og beið mín skínandi fínn þegar ég kom heim áðan. Verður fínt að fara á honum á morgun - því þá get ég lagt í bílageymslunni.

Horfði á Eurovision sérfræðingana í gær og er á því að í úrslitakeppninni eru fyrir mörg slöpp lög. Eitt lag bar þó af og það var Rúmenía - enn og aftur. Þeir kunna greinilega að gera skemmtileg Eurovisionlög. Lögin í undanúrslitunum eru svo yfir heildina miklu betri. Þetta á eftir að verða ansi áhugavert þótt okkar fulltrúi sé að fara í taugarnar á mér. Enda er mér nokk sama hvernig henni gengur.
....

Tiltekt

Eyddi morgninum í tiltekt í fataskápum og hillum. Hef verið grimm í að henda og leggja til hliðar alls konar flíkur sem ekki hafa séð dagsins ljós í 1 eða 2 ár. Svo vorum við að kaupa alveg frábærar kommóður í Ikea og nú er bara nóg pláss. Yndislegt. En ég komst að því að ég þarf að komast til Ameríku að versla. Nánar tiltekið í búðina sem kennd er við hana Viktoríu. Ég hef greinilega ekki verið nógu dugleg að eyða peningum þar í NY í fyrravor. Og nú er undirfataskúffan eins og eyðimörk fyrir utan gæðavöruna frá henni Viktoríu sem sum er farin að slaga í fimm árin enda endist varan hennar von úr viti.
...

Það lítur allt út fyrir að ég fái að kíkja í vinnuna eftir helgina. Mikið verður það mikil tilbreyting! Ég má þó hins vegar ekki fara í fulla vinnu enda held ég að ég hafi ekki orku í svoleiðis ennþá. En þessa vikuna hef ég reynt að borða sem mest og drekka sem mestan vökva og vera dugleg að taka inn vítamín til að bæta upp 3 mánaða næringarskort. Enda er ég að borða rjómaís reglulega samkvæmt læknisráði....ekki amalegt í góða veðrinu!! Ég fór sem sagt í mæðraskoðun í fyrradag og leghálsmælingu í gær og allt leit bara vel út á öllum vígstöðvum. Er hætt að léttast..sem er mikill léttir. Ekki það - það er ekkert leiðinlegt að hefja tvíburameðgöngu á því að missa fullt af kílóum - það er bara hins vegar ekkert æskilegt! Og kannski leiðinlegt á meðan á því stóð :o)
En við gömlu hjúin fórum í bíó í gærkvöldi - það verður stíft prógram í bíó og út að borða í sumar - ég ákvað það í rúmlegunni, eitthvað verður maður að hafa fyrir stafni.... En Tom Cruise stóð sig ágætlega, myndin var spennandi og alveg týpísk svona sumarmynd sem skilur ekkert eftir en er alveg nauðsynlegt að horfa á af og til.
...

Þreyta og leti

Ég er hálfþreytt í dag. Sama á við um Ösku, hún hefur sofið meira og minna síðan við lögðum af stað heim úr bústaðnum í gær. Krakkarnir voru svo duglegir að leika við hana alla helgina að hún er alveg búin. Kom hérna heim áðan með húsbóndanum og skreið bara upp í sófa og neitaði að fara aftur. Ég heyri hroturnar berast úr stofunni einmitt núna. Ég er hins vegar ekki sú brattasta heldur, ætla þó að fara að skríða framúr og reyna að borða eitthvað. Ég fer í skoðun á morgun og fæ þá að vita hvort ég fái leyfi til að byrja eitthvað að vinna aftur. Ég væri alveg til í að kíkja í nokkra klukkutíma á dag....svona til að missa ekki vitið.
...

Ég sit hérna við eldhúsborðið með allt opið út því veðrið er svo gott. Engin sól en svona milt veður. Hrossagauksparið er mætt á svæðið og eru að sveima hérna yfir húsinu, enda verpa þau held ég á túninu hérna við hliðina á götunni. Svo heyrist í sjófuglunum í fjörunni þannig að mér finnst bara vera líf í öllum hornum - í raun alveg bókstaflega því það er könguló að spinna vef í eldhúsgættinni sem Aska eyðileggur í hvert sinn sem hún hleypur út og inn. Ég er að vinna í því að heilsan verði góð ídag, enda erum við á leiðinni í bústað með familíunni. Ég hef verið ansi slöpp undanfarna tvo daga, hálfsvekkjandi eftir að hafa átt betri daga þar á undan. En það verður gott að vera í bústað í Grímsnesinu og dinglast með mömmu og systrum mínum og systrabörnum á meðan pabbi og tengdasynirnir eru að smíða. Mig grunar að Aska myndi hlakka til líka ef hún vissi hvert við værum að fara því hún hefur sérlegt dálæti á frænkum mínum. Þær nenna líka að hangsa með hundinn og leika við hann.
...

Eftir hlýindi helgarinnar sér maður loksins árangurinn, grasið er farið að grænka og manni finnst einhvern veginn að nú sé ekki svo langt í sumarið sjálft. Við gerðum víðreist um höfuðborgina þessa frídaga, fórum í afmæli til Gulla litla upprennandi jeppahöfðingja og stóðum þar á beit í hlaðborði sem Guðrún aka Mamma Reykur töfraði fram. Ég var svo södd að ég þurfti ekkert frekar þann dag og rotaðist fyrir framan sjónvarpið klukkan níu um kvöldið. Á sunnudeginum pöntuðum við okkur nýtt fellihýsi, rétt náðum því áður en þau seldust öll upp. Við sem héldum að allir væru komnir á hjólhýsi í sumar! Við vorum að stækka við okkur og hitt er sem sagt til sölu ef einhver hefur áhuga (Coleman Taos, árg. 2001). Síðan kíktum við í Ikea og keyptum kommóðu og skenk. Þetta ætluðum við að gera fyrir 2 mánuðum en samband mitt við Gustavsberg kom alltaf í veg fyrir þennan verslunarleiðangur. Dagurinn endaði svo hjá Huldu systur í sólbaði í Fossvoginum, fengum þar bakkelsi og síðar kvöldmat. Annað kvöldið í röð lagðist ég alsæl á koddann eftir að hafa verið vel nærð og ógleðin í lágmarki. Í gær héldu svo heimsóknir og átið áfram. Við kíktum til mömmu og pabba og þar fékk ég lummur! Namminamm. Síðan renndum við í Hólabergið til tengdó og þar var bara múgur og margmenni í 1. maí kaffi. Og veitingarnar eftir því. Síðan fórum við bara heim í kvöldsólina á Álftanesinu þar sem við grilluðum og ég datt í kókið í fyrsta sinn á þessari meðgöngu og mikið rosalega svakalega var það gott að geta loksins loksins þambað smá kók. Sem sagt þessa helgi borðaði ég meira en síðustu 3 mánuði samanlagt. Spurning hvert ég eigi að bjóða mér í kaffimeðlæti í dag?
...

Eftir að hafa stúderað margvíslegt efni sjónvarpsstöðva af miklum móð frá morgni til kvölds í margar vikur þá má segja að ég sé orðin alveg sérfræðingur í svokölluðu "daytime tv". Og nokkuð ljóst að innlendar sjónvarpsstöðvar eru ósköp slappar nema ef Bíórásin sendir út óvart einhverja bíómynd sem ég hef ekki séð. Annað er varla horfandi á nema Martha, Oprah og Dr. Phil. Ég er sem sagt ekki hrifin af þessum sápum sem eru annars sendar út á daginn, þá kveiki ég frekar á Rás 1. Discovery og Animal Planet eiga vinninginn ásamt BBC Food, það er nokkuð ljóst. Ég veit ekki hvernig ég hefði komist af þessar vikur án Fjölvarpsins! Uppáhaldsþættirnir eru fyrst og fremst svona animal rescue þættir þar sem aðframkomnum gæludýrum er komið til bjargar af laganna vörðum og þeim hjúkrað til heilsu á ný. Svo er líka gaman að fylgjast með henni Mörthu Stewart gera eitthvað sniðugt fyrir heimilið. Já, það hefur verið fróðlegt að upplifa það að vera heima alla daga og geta lítið annað gert en horft á sjónvarp. En ég skil ekki af hverju Sjónvarpið notar ekki tækifærið og endursýnir fullt af góðum þáttum og heimildarmyndum á daginn.
..

Það er komið sumar samkvæmt tímatalinu en það var bara allt hvítt í morgun. Það er nú reyndar allt farið að mestu núna, enda skín sólin alltaf á Álftanesinu. :o) Annars fóru lok vetrar alveg fyrir ofan garð og neðan hjá mér, enda var ég ekki að velta mér mikið upp úr veðrinu þegar maður liggur til skiptis í rúminu heima hjá sér eða á Kvennadeild LSH inn á milli stefnumóta við Gustavsberg. Jamm og jæja. Það fer vonandi að sjá fyrir endann á þessari ógleði og endalausum uppköstum. En þegar maður gengur með "double trouble" eins og einhver sagði, þá er þetta víst stundum enn verra en venjuleg meðgönguógleði. ;o) Ég hef ornað mér síðustu daga við hugsanir um sumarbústaðaferðir og útilegur og letilegar setur í sumarsólinni og ætla bara rétt að vona að sumarið verði ekki of rigningarsamt hérna á suðvesturhorninu fyrst að ekki verður farið á suðlægar slóðir. Hálfgerð synd þegar maður er 10 kílóum léttari að geta ekki spókað sig í bikini, en ég fer bara í staðinn í bumbulínusund í Hrafnistulauginni og trítla um laugina að gera svona ljúfar og léttar æfingar eins og gamalmenni. Ægilega notalegt. Skrítið hvað manni líður alltaf vel í vatni, jafnvel þótt maður hafi ekki getað lyft höfði frá kodda vegna vanlíðan allan daginn, um leið og maður er komin ofan í passlega heita laugina þá bara hverfur öll ógleðin. Ég vildi ég gæti búið ofan í svona laug alla daga.
....

Orðsporið....

Var að ljúka við að láta taka mynd af mér hérna úti á plani í sólinni og rokinu. Ég er einmitt svo falleg þessa dagana, eða þannig. Og í tengslum við þetta hef ég verið að krúsa á netinu og skoða flotta bíla. Jaaá, nú verðið þið bara að bíða og sjá... :o)
...

Um daginn var ég að fylgjast með krókusum og trjám vera að komast í vorgírinn en núna er gaddur úti, snjór og sól. Skrítin þessi íslenska veðurtilvera. Aska er hæstánægð, hún virðist elska snjóinn og finnst langskemmtilegast að leika sér úti þegar það er nógu kalt og mikill snjór. Hún hefur stækkað töluvert og hálfgerður sláni í útliti þessa dagana. Ferlega óþekk á köflum, en það er ósköp eðlilegt fyrir fjögurra mánaða hvolp. En það fer að líða að því að eigandinn fari með hana á námskeið, það er allavega búið að skrá þau á eitt slíkt hjá Retrieverdeildinni hjá HRFI.Vonandi verður það sem fyrst!
Jeppinn er búinn að vera heila eilífð í breytingu, fyrst reyndar á planinu fyrir framan verkstæðið í 4 vikur en fór loks inn í síðustu viku og ætti að vera tilbúinn í dag eða á morgun. Eiginmaðurinn er orðinn svolítið mikið ofboðslega óþolinmóður og pirraður á þessum seinagangi. En mig grunar að það eigi eftir að líða úr honum um helgina, en þá á prufukeyra hina breyttu Tacomu í snjónum.
...

Jarðskjálfti..

Funduð þið fyrir jarðskjálftanum? Ég fann bara nokkuð vel fyrir honum, fyrst smákipp og svo bara nokkuð þungann kipp, var ekki alveg viss fyrst hvað þetta væri. Datt ekki skjálfti í hug en sá svo að það var verið að fjalla um þetta á NFS. Það er nú meira hvað hægt að er mala yfir litlu í langann tíma á þeirri stöð. Tók einmitt eftir þessu andleysi á stöðinni á meðan ég lá eins og skata í síðustu viku. Komst einnig að raun um það að eina sjónvarpsstöðin sem horfandi er á á daginn er Animal Planet. Allt annað er óttalegt rusl. Nema kannski af og til BBC food!

Og fyrst ég er að tjá mig um sjónvarp þá ætla ég að lýsa óánægju minni með að Nana skyldi detta út úr Idolinu sl. föstudag. Af hverju þarf hið íslenska idol alltaf að snúast upp í vinsældakeppni sem hefur ekkert með hæfileika að gera?
...

Frískt loft

Ég var tekin út úr hýði mínu og viðruð aðeins í morgun, enda farin að skjóta rótum í rúminu eftir margra daga veikindalegu. Það var því mjög frískandi að kíkja á hundasýningu og fara svo og viðra Ösku við Rauðavatn. Vatnið er alveg ísilagt og nokkuð gaman að renna sé aðeins. En það var líka jafngott að koma heim, fá sér nýtt brauð og kakó og lesa sunnudagsmoggann.
Þetta er allt að koma vonandi...

Gylltar strendur og grænblátt haf

Ég bíð spennt eftir svörum frá nokkrum hótelum við Tyrklandsstrendur um það hvort þar sé aðstaða til að tengjast internetinu í gegnum háhraðatengingu. Ekki af því að ég ætli að blogga svona mikið í fríinu, heldur svo að við komumst í frí yfirhöfuð. Við erum í ánauð fiskvinnslunnar og fiskmarkaðsuppboðsins og því "nauðbeygð" til þess að vera á þannig hóteli að það bjóði upp á adsl-tengingu fyrir fartölvur. Þangað til mæni ég stóreygð á vefsíður ferðaskrifstofanna og virði fyrir mér óraunverulegar myndir af fögrum ströndum, heiðbláum himni og skærri sól.

Við fengum heimsókn áðan, vinafólk okkar kíkti við og færði okkur kræsingar úr bakaríinu. Við slógum því upp smámorgunverðarveislu. Þetta gat ekki gerst á betri tíma því við vorum hálflengi að dröslast framúr í morgun enda svaf Aska til að verða hálftíu. Algjör lúxus. Við vorum að koma úr fjöruferð. Sú litla var alveg í essinu sínu og elti m.a. fugla lengst út í sjó. Hún var líka skoluð með garðslöngunni núna áðan þegar við komum heim, enda öll í salti og sandi. Framundan er afmæliskaffi hjá pabba. Best að hafa sig til og fara og kaupa afmælisgjöfina handa honum.
...

Vínber og gulrætur

Klukkan er rétt að verða hálfellefu á sunnudagsmorgni og hér lúra allir eftir göngutúrinn í rigningarúðanum. Alveg ægilega notalegt. Bóndinn var að skríða aftur uppí og alls staðar eru sofandi kettir og voffi. Þessi síðastnefndi hrýtur meira að segja enda tekur það á að fara einn rúnt meðfram fjörunni þegar maður er bara hvolpur ennþá. Eftir að hafa fengið vínber og gulrætur þá lognaðist Aska útaf og liggur núna í sófanum eins og prinsessa, nema ég held að prinsessur hrjóti ekki.

Ég er að baka köku, enda er kaffi seinna í dag i tilefni af 35 ára afmæli bóndans í gær. Ég er ekki alveg búin að ákveða annað meðlæti. En það kemur. Ég hlýt að fá hugmynd að einhverju á eftir enda úthvíld. Fór snemma að sofa bæði í gær og í fyrradag. Í fyrradag rétt náði ég að halda mér vakandi fram yfir fyrri hlutann í Idolinu, en sofnaði yfir úrslitunum.
..

Sextuttuguogsjö

Það hljómar aðeins betur en fimmtuttuguogþrjár, en þá vorum við vakin af værum blundi. Lítill voffi búinn að fá í magann og afleiðingarnar m.a. að veltast um í þvottavélinni núna. Og Aska búin að fara í sitt fyrsta bað. Það gekk ágætlega.
...

Endalausir mánudagar

Aftur kominn mánudagur en ég er ólíkt úthvíldari núna en fyrir viku, enda búin að flatmaga í bústað alla helgina með tilheyrandi pottabrölti og áti. Las eina bók og át fullt af nammi. Fór alveg skikkanlega snemma að sofa bæði kvöldin. Það kom upp smá vinnuhasar, en í sjálfu sér gat ég lítið gert þarna lengst uppi í sveit. En ég þarf eitthvað að láta kíkja á gemsann, hann er farinn að slökkva á sér í tíma og ótíma. Þegar það bætist ofan á slappa rafhlöðu og slæma tengingu þá er alveg kominn tími á útskiptingu.
..

Þessi helgi flaug einhvern veginn framhjá manni án þess að maður áttaði sig almennilega á því að það væri helgi. Annars var dagurinn í gær ósköp rólegur, hann fór mest megnis í heimilisbókhald og vinnu en við enduðum svo á því að fara í bíó, á Brokeback Mountain. Það er virkilega góð mynd, svolítið hæg en gott handrit og vel leikin. Og átakanleg saga um ást í meinum. Næst á dagskrá er að fara á Jane Austen og Geishumyndina með stelpunum, en ég ætlaði nú reyndar að vera búin að lesa bókina fyrst sem síðarnefnda myndin er gerð eftir. Hef ekki alveg náð að detta í hana ennþá. Hún er á náttborðinu, en ég hef nú aðallega verið að liggja í ferðabæklingum og sólarlandaauglýsingum og handbók um Andalúsíu. Næ að lesa um eitt hótel áður en ég sofna. Janúar er alltaf einhvern vegin svona - að dagarnir fljúga áfram í myrkri og maður er alltaf að fara að sofa.

Ég held ég þurfi að fara að komast í almennilega fjallaferð. Sjá snævi þaktar öldur og fell og fá íslenskt vetrarríki beint í æð. Sofa í fjallaskála, borða góðan mat og jafnvel komast eitthvað á skíðin. Ég myndi meira að segja þiggja nokkrar festur í skafli. Eða blindbyl. Fara í heita laug í 10 stiga frosti. Syngja í góðra vina hópi...

"Langar nætur, ljósa kalda daga,
hef ég leitað, það er mannsins saga,
fundið aðeins óma gleymdra laga
en ekkert svaaaaar, ekkert svar...."

Æ, best að drösla af stað í vinnuna. Er mánudagur eða hvað?!!

.....

Misþyrmingar

Jóakim Gottlieb eðalbangsi, öðru nafni Gotti, á ekki sjö dagana sæla núna. Eftir að hafa fengið að vera í friði í rúm tuttugu ár er honum núna flengt í allar áttir, nöguðum og slefuðum. En hann virkar ágætlega. Alveg eins og sjónvarpið á lítil börn. Aska er til friðs í fimm mínútur ef hún nær í Gotta. En ég fer bráðum að fjarlægja greyið Gotta. Áður en hundurinn verður orðinn of ágengur.

Annars vorum við í afmæli í gær hjá tvibbalingunum. Þær bera árin þrjátíu og þrjú bara vel. Og veitingarnar voru góðar. Aska var alveg búin þegar við komum heim. Það tók á að vaka lengur en til átta.
...

Vá!

Bara hálftíma á leiðinni í vinnuna í morgun í stað klukkutíma eins og í gær. Færri hálfvitar á sumardekkjum eða snjóhrædd grey að þvælast fyrir. Best að halda upp á þetta með pressukönnukaffibolla.
...

Mission accomplished

Skrítin tilfinning að standa úti klukkan hálfsex um morgun í skafrenningi og klofa í sköflum í garðinum hjá sér, sjá tunglið vaða í skýjum og heyra í briminu. Megintilgangurinn var þó auðvitað að fylgjast með því hvort Aska skilaði mat og drykk á réttan stað.

Það var líka gott að koma inn aftur og kúra upp í sófa með kaffibolla í myrkrinu.

...

Svart, svart, svart og aftur svart...

Nú þegar vika hinna svörtu Toyota-bíla er á enda þá er ekki úr vegi að staldra aðeins við. Ég er ekki frá því að þetta virki sem svolítil bilun að eiga fjóra bíla á planinu hér fyrir utan og er ég jafnvel að spá í að leggja Corsunni einhvers staðar annars staðar og Snjófus ofurjeppi er á leiðinni á bílasöluna loksins á næstu dögum. Stærri Toyotan fer síðan innan tíðar í breytingu og þá verður talan aðeins eðlilegri. Hins vegar neita ég því ekki að þessar tvær svörtu eru bara fjandi glæsilegar. Og Aska hin svarta harmónerar líka ágætlega við þetta svarta þema sem er í gangi.

Það eru allir svolítið þreyttir á þessum bæ, ekki síst ferfætlingar. Enda hafa frænkur tvær verið duglegar að leika við þá, ekki síst eldri frænkan sem gisti hjá okkur í nótt og hefði sú helst viljað sofa hjá Ösku í hundabúrinu. Aska fékk líka að prófa að lúra aðeins í hjónarúminu, því allir vildu kúra aðeins lengur í morgun. Ægilega notalegt. Hins vegar verð ég að játa það að það fer betur í mig að hafa malandi kött sofandi á koddanum en nagandi hvolp...
...

Líkamsrækt og kjúklingur

Alltaf skal það sama brenna á manni í byrjun janúar, heilbrigði - mataræði - lífstíll. En á sama tíma er endalaust myrkur og rigning. Reyndar snjóaði í gær og hæfði vel þessum síðbúna Þrettánda hérna í sveitinni því þá var loksins kveikt í brennunni og alls staðar var verið að skjóta. En það urðu ákveðin þáttaskil í gær þegar húsbóndinn stal íþróttatöskunni minni og skellti sér í Hress á átaksnámskeið fyrir karla. Ég á nú minn þátt í að ýta að honum auglýsingunni og benda honum á að honum veitti sko ekki af svona námskeiði. Hann er alls ekki feitur, hefur aldrei verið það en það má alltaf styrkja og auka úthald, enda ætla sumir sér að leika meira á torfæruhjólinu í vor og sumar og þá þarfheldur betur úthald og styrk. Svo er ég að vona að hann sjái ljósið og hætti að kaupa nammi og gos - auðveldar mér allt átak! Það er kannski bjartsýni aldarinnar. En þegar að þeim tíma leið sem hann yrði búinn var ég eiginlega tilbúin með kvöldmatinn og biðum við Aska bara rólegar, hún var ekkert að kippa sér upp við sprengugleði nágrannanna og var bara að reyna að laumast inn í eldhúsið þaðan sem góða lyktin af ofnsteiktu kjúklingaleggjunum kom. En aldrei kom maðurinn heim, og var nú farið að líða langt fram yfir eðlilegan tíma. Ég var farin að halda að hann hefði örmagnast í tímanum og líklega væri verið að stumra yfir honum á meðan ég væri að hafa áhyggjur af ofelduðum mat. Ég hringdi í gemsann og viti menn...minn maður var bara að sýna nýja jeppann. Búinn að vera á týpískum jeppakarlakjaftagangi í þrjú kortér sem þeir einir þekkja sem hafa kynnst jeppamönnum. En sem sagt, hin ameríska Toyota er mætt á svæðið, ægilega flott og svört í stíl við Ösku hina austfirsku.
....

Laugardagslíf

Ég var að hugsa um hvort ég ætti að tjá mig eitthvað um hversu það fór gríðarlega í taugarnar á mér að Herra Tarantino var að dásama drykkusiði íslenskra kvenna eða hvort ég ætti bara að halda mig við dýralífslýsingar úr sveitinni. Ég gæti t.d. sagt frá því að við hjónin sváfum ekki út í morgun því það þurfti auðvitað að hleypa Ösku út að pissa klukkan sjö. Þá var liðinn hálftími framyfir hinn venjulega vöknunartíma í vinnuna með húsbóndanum og hún missti þolinmæðina og gólaði því mjög hátt klukkan sjö. Ég var alveg viss um að hún myndi vekja alla götuna. Og ég var byrjuð að taka niður jólaskrautið klukkan átta, enda glaðvöknuð og búin að lesa Moggann og Fréttablaðið og fussa yfir Blaðinu, fá mér kaffi og setja í þvottavél. Nebbi ákvað hins vegar að sofa út og lúrði á rúmteppinu til fóta alveg fram til klukkan níu. Núna klukkan ellefu er Aska búin að lúra tvisvar og er núna á þriðja lúr. Ég er að hugsa um að taka hana til fyrirmyndar og leggjast aðeins í sófann með Eragon. Alveg ágætis drekasaga fyrir börn og ég er greinilega á sama þroskastigi og börn og voffar, því mér líkar það ágætlega að lúra og lesa sögur ætlaðar börnum og unglingum.

...

Rok og rigning

Veðrið hefur verið með alveg eindæmum leiðinlegt sem af er nýju ári. Það var fyrst í gærdag sem aðeins rofaði til eftir að það snjóaði og frysti en nú er enn og aftur rok - eða réttara sagt stormur og enn verra veður framundan í dag og næstu daga. Aska þverneitaði að fara í vinnuna í morgun, settist bara á forstofumottuna og vildi ekki einu sinni fara út að pissa. Henni er illa við svona leiðindaveður og vill auðsjánlega pissa bara inni. Skiljanlega! En hún var nú samt tekin í fangið og farið með hana út í bíl. Við vorum tvær einar heima í gærkvöldi ásamt kisunum auðvitað sem sváfu út um allt hús. Eftir að hafa leikið sér og borðað og farið út að pissa og það allt saman varð sú litla ansi vælin eitthvað og óróleg. Endaði fyrir framan sófann í stofunni þar sem hún reyndi nokkrum sinnum að komast uppá en tókst ekki og skældi hún í hvert sinn sem hún pompaði niður á afturendann. Eitthvað sem hún hefur aldrei gert áður og hefur aldrei haft neinn áhuga á að fara upp í sófa enda það almennt ekki í boði. Þá teygði hún sig og þá sá ég hverju sætti. Á sófanum lá nefnilega bolur og gallabuxur af húsbóndanum - sem eins og oft áður hafði verið að skipta um föt áður en hann fór að jeppastússast í einhverjum bílskúr - og Aska var að reyna að toga fötin til sín. Ég lyfti henni upp í sófann og hún tók bolinn einhvern vegin undir sig, boraði trýninu í efnið og saug aðra ermina og lagðist með þetta ofaná gallabuxurnar, alsæl. Og varð róleg sem lamb og steinsofnaði. Það er auðséð hver er í fyrsta sæti... :o)
...

Namm namm

Alveg ferlega girnilegur réttur sem verið er að bera fram í einum ofboðslega breskum þætti á BBC food. Englendingar kunna alveg að búa til eftirrétti, þeir mega eiga það. En maður á kannski ekkert að vera að horfa á svona þætti þegar framundan er aðhald og meinlætalíf. Ég fann meira að segja fyrir kókskjálfta í dag, líklega vegna ríkulegrar neyslu á þessum eðaldrykk yfir hátíðarnar.

Annars hefur það verið ansi fróðlegt að fylgjast með sambýli katta og hunds á heimilinu. Sú elsta, Ísafold, er auðvitað langskynsömust og lætur eitthvað lítið hundspott ekki trufla sig við að betla mat. Nebbi er hins vegar meiri rola og mamma hans er svo langmesta rolan, fer ekki undan rúminu fyrr en Aska er sofandi í kassanum sínum í bílskúrnum.

Framundan er sjónvarpsgláp og svo snemma í háttinn. Klukkan er átta og ég er byrjuð að geispa...

....

Annasamur dagur

Aska hin austfirska var mjög svo önnum kafin í gær. Hún var vakin "til vinnu" hálfsjö í gærmorgun og lúrði og lék sér á skrifstofu húsbóndans fram eftir morgni. Síðan fór hún í nokkra stutta bíltúra, m.a. í dýrabúðina að kaupa ól og nagbein en tók síðan á móti gestum heima, m.a. litlum frænkum sem fannst voða gaman að leika við voffa og svo kom stóri bróðir hennar í stutta heimsókn. Það urðu miklir fagnaðarfundir og þau kúveltust um allt gólf af gleði. En þetta tók á fyrir lítinn hvolp og hún var gjörsamlega búin á því um mitt kvöld. Við vorum eiginlega ekkert síður þreytt og vorum því komin snemma í háttinn. Allir sofnuðu snemma, menn, kettir og hundur en sú litla lét þó af og til heyra í sér inn á milli hvolpablundanna en eftir klukkan eitt heyrðist ekki í henni, enda þá greinilega steinsofnuð og hún var svo aftur vakin núna áðan. Þegar ólinni var smellt á hana fór litla skottið að sveiflast til á fullu, og hún settist á mottuna í forstofunni og beið eftir því að fá að fara út. Sem sagt, rúmlega fyrsti sólarhringurinn í sveitinni liðinn og enn sem komið er hafa ekki miklir árekstrar verið og enginn köttur farinn að heiman enn sem komið er.
.....

Öskubuska

Í gær bættist við nýr fjölskyldumeðlimur í sveitina. Hún heitir Aska, er Norðfirðingur og hefur ekki áhuga á köttum. Hún fór í vinnuna í morgun með eiginmanninum og dundar sér þar við að naga í tærnar á honum. Hún svaf í alla nótt, vaknaði einu sinni við veðurofsann og vældi en fór aftur að sofa þegar hún sá að hún hafði ekki verið yfirgefin.

Í gærkvöldi var henni strax kennt að það væri ekki í boði að vera alls staðar, enda þurfa kisurnar líka að eiga sitt athvarf. Og Nebbi er allavega ekki enn farinn að heiman, heldur fylgist vel með öllum hreyfingum Ösku og er jafnvel svolítið spenntur að sjá.

Þetta verður fróðlegt...

....

Jólaleti

Það var spurning hvort Jóladagur eða Nýársdagur væri meiri letidagur en sá síðarnefndi hafði þessa samkeppni með stæl því ég fór ekki úr náttfötunum fyrr en þegar kom að eldamennsku um kvöldið. Og satt að segja fór ég varla framúr, lá og las heila bók og horfði á 2 bíómyndir.

Í dag bíður mín það skemmtilega verkefni að læra á nýtt launabókhald fyrir fiskvinnsluna. Læt það ráðast hvort ég fer í vinnuna, enda svo sem ágætt að sitja hérna við borðstofuborðið og hlusta á Sunnu hrjóta. Það hefur róandi áhrif á mig og kemur í veg fyrir stórslys á tölvunni þegar þetta (launaforritið) er ekki alveg að virka eins og ég hélt að það ætti að gera.

Gamlárskvöld var hið skemmtilegasta kvöld þrátt fyrir arfalélegt skaup, góður matur og skemmtilegar hefðir. Bollinn minn leit ágætlega út fyrir komandi ár, brjálað að gera að venju og mikið af fólki þannig að varla verður árið lognmolla. Og Reykvíkingar brugðust ekki í skotgleðinni, himnarnir loguðu og reykmökkurinn lagðist yfir allt. Það er alltaf jafngaman að fylgjast með flugeldunum frá pabba og mömmu, útsýnið svíkur ekki. Við vorum komin ágætlega snemma heim, þannig að ekki var nú beint ástæða til þess að hanga á náttfötunum í allan gærdag, en mikið hrikalega var það notalegt!
...